«Зынаргъ редакци, фæнды мæ «Клуб Осет Алан»-ы номæй арфæйы ныхæстæ зæгъын æрыгон курдиатджын лæппу Милдзыхты Артуры тыххæй, кæцы 2015 азы райдайæнæй 2016 азы онг бакуыста Турчы сæйраг горæт Стамбулы ирон фæсивæды кафджыты къорды разамонæгæй.

Афæдзы дæргъы Артур йæхи æрмæст курдиатджынæй нæ равдыста, фæлæ ма хорз кæстæрæй. Хистæртимæ — хистæр, кæстæртимæ — кæстæр кæмæй фæзæгъынц, ахæмæй.

Хиуылхæцгæ, хæрзæгъдау, йæ куысты мидæг та æцæг профессионал. Ацы миниуджытæ цыбыр рæстæгмæ фæзындысты нæ кæстæр фæсивæдыл.

 

Райдай уæздан кафтæй æмæ цæрдæг кафты онг — абон адæм сæ цæст æрæвæрынц нæ клубы кафæг къордыл. Æмæ уый фæдыл Милдзыхты Артурæн йæ бакуысты егъау бавæрдæн зæгъæм стыр бузныг!

Æхсæнад «Осет Алан Културы» сæргълæууæг Сæбæтхъуаты Илиас Аслан».

Ацы фыстæг æрæджы райстам Туркæй. Ныртæккæ елхотаг лæппу Милдзыхты Артур у Ираны хъæуы сывæллæтты кафджыты ансамбль «Зори Ирана»-йы разамонæг. Цы æнтыстдзинæдтæ æвдисынц хæдахуыр артисттæ алыхуызон конкурсты æмæ равдыстыты, уый тыххæй нæ газет иу æмæ дыууæ хатты нæ фыста. Стæй ма дарддæр дæр аивадуарзджыты зæрдæтæ кæй рухс кæндзысты, уый дæр гуырысхойаг нæу.

Æхсызгон нын уыдис, цы зæрдæмæхъаргæ ныхæстæ æрбарвыстой нæ ирон   æфсымæртæ Стамбулæй, уыдон кæсын, æмæ сæ абон хæссæм нæ газеткæсджыты рæгъмæ.

Æцæгæлон бæстæйы Ирыстоны кад Артур дæлæмæ не 'руагъта, æмæ ахæм фæсивæдæй иууылдæр сæрыстыр цæуылнæ хъуамæ уæм! Ноджы ма стырдæр сфæлдыстадон æнтыстдзинæдтæ йæ къухы бафтæнт!

---

СУГЪАРАТЫ Елизаветæ.