Хъæлдзæг изæр арæзт æрцыд Ираны хъæуы культурæйы Хæдзары сылгоймæгты Æппæтдунеон боны фæдыл.

Бæрæгбон байгом кодта хъæуы сæргълæууæг Фидараты Тотырбег:

— Сылгоймаг у мад, хо, хæдзары 'фсин, къонайы фарн, цард æмæ амонддæттæг, хъомылгæнæг.

Сылгоймаг цы хæдзары нæ уа, уымæн йæ къултæ сæрдыгон дæр халас æвæрынц. Сымах уе 'ппæт дæр стут арфæйы аккаг, æмæ уын æз дæр зæрдиагæй арфæ кæнын. Буц æмæ райгонд ут, æнæниздзинад æмæ амондæй та — æфсæст!

Зæрдæбын арфæйы ныхæстæ хъæуы сылгоймæгтæн ракодта фосы дохтыр Дзгойты Батраз дæр.

Раппæлыны аккаг чи у ацы хъæуы сылгоймæгтæй, ахæмтæ дзæвгар сты. Уыдонмæ хауынц, æнæзивæгæй адæмæн лæггад чи кæны, ахæм медицинон кусджытæ Баймæтаты Иринæ æмæ Чеджемты Анжелæ. Бирæ азты хæринаггæнæгæй фæкуыста колхозы тракторон бригады 83-аздзыд Дзуццаты Тамуся, дыууиссæдз азæй фылдæр лæггад кæны цæрджытæн райфæлхасцæдисы дуканигæс Гайты Эльмæ, йæхи адæмæн бауарзын кодта посты хайады сæргълæууæг Тедеты Оксанæ.

Мадзалы уазджыты сбуц кодта культурæйы Хæдзары зарæггæнджыты къорд. Хетæгкаты Къостайы æмæ Чеджемты Æхары æмдзæвгæтæ бакастысты Фидараты Альберт, Мæргъиты Викæ, Плиты Сабинæ, Плиты Астемыр, Дегъуаты Дианæ, Абайты Аделинæ, Алыккаты Аланæ, Дзантиаты Аидæ. Хонгæ кафт акодтой Фидараты Альберт æмæ Мæргъиты Викæ. Театралон сценкæты спектакльтæ «Усгур Гаци», «Горæтаг чызг æмæ хъæуккаг ус» æмæ «Золотая свадьба»-йæ ахъазыдысты Туаты Иман, Кочиты Эрик, Дзантиаты Вероникæ, Мыртазты Фатимæ, Алыккаты Аланæ, Багаты Хъазыбег, Плиты Сабинæ. Хуынд адæмы сæ рæсугъд кафт æмæ зардæй бахъæлдзæг кодтой Дзарасаты Ленæ, Фидараты Ленæ æмæ Мæргъиты Ольгæ. Концертон программæ кæронмæ куы бахæццæ, уæддæр адæм сæ хæдзæрттæм нæ тагъд кодтой, фæкафыдысты, фæзарыдысты.

Бæрæгбон саразынæн кæй баххуыс кодта, уый фæдыл Фидараты Тотырбегæн сылгоймæгты номæй раарфæ кодта Рæмонаты Зинæ.

Мадзал бацæттæ кодтой культурæйы Хæдзары æмæ библиотекæйы кусджытæ Токаты Зæлинæ, Фидараты Верæ æмæ Мæргъиты Ольгæ.

---

КЪУБАЛТЫ А.