23.04.2021 Ивгъуыд æртыццæджы нæ бæстæйы Президент Владимир Путин Уæрæсейы Федерацийы Федералон Æмбырды раз йæ æрвылазон Ныстуаны цы уагæвæрдтæ фæнысан кодта, уыдон не 'мбæстæгты зæрдæты уадзынц ныфс. Зæгъæм, сæйрагдæр æргом дзы аздæхта мидбæстон царды фарстатæм. Уыимæ социалон политикæ, æнæниздзинад хъахъхъæнынад æмæ экономикæ.

Адæймаджы зæрдæйыл тынгдæр æмбæлынц паддзахадон æххуысы уæлæмхасæн мадзæлттæ. Фыццаджыдæр, сывæллонджын бинонтæн æххуыс. Президент куыд банысан кодта, афтæмæй æнæххæст бинонты чи хъомыл кæны, 8-16-аздзыд ахæм сывæллæттæн ацы азы 1-æм июлæй фæстæмæ уыдзæн æрвылмæйон бафыстытæ — рæстæмбисæй 5650 сомы. Уый зынгæ фæхуыздæр кæндзæн фæкæсинаг бинонты уавæр. Æнæххæст бинонтæ та мах районы хъæуты дæр чысыл нæй.

Æрвылаз нæ алчидæр æвдисæн вæййы ахæм цаутæн: цæстдарæг уагдæтты кусджытæ фæсидынц адæммæ, цæмæй баххуыс кæной бирæсывæллонджын кæнæ зынвадаты бахауæг бинонтæн сæ сывæллæтты скъоламæ бацæттæ кæнынæн. Президенты Ныстуаны загъд ис: «Скъоладзаутæ æмæ фидæны фыццагкъласонтæ кæм ис, уыцы бинонтæн ацы аз хъæудзæн бафидын алкæмæн дæр 10000 сомы. Фыццагкъласонтæн ахæм æххуыс хъæудзæн адарддæр кæнын фидæны азтæм дæр». Мæты-иу чи бацыд, куыдæй срæвдз кæндзынæн мæ скъоладзауы, зæгъгæ, уыдоны ныфс бацыд, сæ хъæбултæ сæ иннæ æмгæрттæй æгуыдзæгдæрæй кæй нæ згъордзысты ахуырмæ, уымæй.

Уымæй уæлдай ма, Ныстуаны куыд загъд ис, афтæмæй бафыстытæ уыдзæн царды зын уавæры бахауæг æнхъæлцау сылгоймæгтæн. Бафысты рæстæмбис бæрц уыдзæн 6350 сомы. Нымæцæй цыма бирæ нæу, афтæ кæсы, фæлæ фæкæсинæгтæн — зынгæ æххуыс.

Æмæ ма иу хъуыды. Президент куыд фæнысан кодта, афтæмæй ацы азæй фæстæмæ, сывæллоныл цалынмæ авд азы сæххæст уа, уæдмæ мадæн йæ мызд хъуамы фыст цæуа æххæстæй. Уый дæр, кæй зæгъын æй хъæуы, у хорз æххуыс.

---

 

КЪУБАЛТЫ Солтан,

«Иры Стыр Ныхас»-ы Кировы районы

хайады уынаффæдоны сæрдар.